नेपाली कांग्रेसका नेता तथा संघीय सांसद डा. शेखर कोइरालाले आफ्नै दलको सत्ता साझेदार अर्को दल नेपाल कम्युनिष्ट पार्टी (नेकपा) एमालेलाइ खाली जग्गा हडप्ने गरेको आरोप लगाएका छन्।
नेता कोइरालाले शनिबार काठमाडौँमा भूमि सम्बन्धी आएको विधेयकमा संबोधन गर्दा उनले यस्तो धारणा राखेका हुन्। यस्तो महत्वपूर्ण बिधेयकमा धारणा राख्न दिएनन र त्यसमाथि छलफल गर्न नै नदिइएको आरोप उनले लगाएका छन्।
उनले भने, ‘अहिले भूमि सम्बन्धी विधेयक छ। एमाले त जहाँ खालि जग्गा देख्छ त्यहाँ एमालेको आँखा गइहाल्दो रहेछ। जहाँ पनि तपाईं हेर्नुस् । यो गोकर्ण रिसोर्ट, राजा वीरेन्द्रको सम्पत्तिमा एमालेका आँखाहरू हेर्नुस्। लिचीबारी पोखराको हेर्नुस्, गिरीबन्धु टी-स्टेट हेर्नुस्। जताततै एमालेको मात्रै सुनिन्छ।’
‘अब यस्तो अवस्थामा भूमिसुधार मन्त्रीले राजिनामा नदिएर जबरजस्ती बसिरहनुभएको छ। एमाले कास्की जिल्ला कमिटीले नै भूमिसुधार मन्त्रीले राजीनामा दिनुपर्छ भनेको छ। बिचौलिया एकजना हुनुहुँदो रहेछ। रेशम चौधरीजीको पार्टीको। सांसद पनि बिचौलिया भइसकेपछि त के अवस्था हुन्छ देशको?’
