नेपाली कांग्रेसका केन्द्रीय सदस्य एवम जनसम्पर्क समन्वय विभागका प्रमुख किरण पौडेलले एक अन्तर्वार्तामा हाल पार्टीको १५ औं महाधिवेशन केन्द्रीत गतिविधिहरु भइरहेकाले समयसीमा भित्रै महाधिवेशन हुने मात्र होइन जनसम्पर्क समितिहरुको राष्ट्रिय महाधिवेशनको तालिका नै तोकिएकाले समय सिमामै राष्ट्रिय अधिवेशनहरु हुने कुरा बताएका छन्।
विदेशमा पार्टीको संजाल विस्तार गर्नेक्रम जारी रहेको छ, महाधिवेशनलाई नै केन्द्रीत गर्दै विदेशस्थित जन सम्पर्क समितिहरुको अधिवेशनको तयारी पनि भइरहेको छ। जनसम्पर्क समितिलाई आश्विन मसान्तसम्म सबै देशले नवीकरण गरेर नयाँ सदस्य बनाएर केन्द्रीय कार्यालयमा बुझाउन निर्देशन भइसकेकाले सम्पर्क समितिहरुले समयमै अधिवेशन सम्पन्न गर्छन, पौडेलले भनेका छन्।
कांग्रेससँग आबद्ध विदेशस्थित रहेका जनसम्पर्क समितिहरूले कांग्रेसको १४ औं महाधिवेशन भन्दा अगाडि सबैको अधिवेशन भएकाले १५ औं महाधिवेशनमा पनि पार्टीको विधानअनुसार अधिवेशन समयमै सकिन्छ, उनले भनेका छन्।
देशहरूको अधिवेशनको लागि पार्टी केन्द्रीय समितिको हालैको बैठकले निर्देशन गरिसकेकाले साउन महिनाभित्र सबै प्रक्रिया सुरु गरेर आश्विन मसान्तसम्म त्यसको सदस्यता नवीकरण गरिसक्ने र पुस मसान्तभित्र अधिवेशन सम्पन्न गर्ने केन्द्रले निर्देशन भएकाले सोही अनुसार तयारीमा लाग्न पनि उनले आग्रह गरेका छन्।
अहिले सदस्यता वितरण पुरानै विधि र प्रक्रियाबाट भइरहेको उल्लेख गरेका उनले कांग्रेसको विधान र नियमावलीले निर्देशित गरेको फारामहरु सबै देशमा पठाएइएकाले सोही अनुसार क्रियाशिलता वितरण गर्न पनि अनुरोध गरेका छन्। क्रियाशिलता सम्बन्धित देशको जनसम्पर्क समितिले नै सदस्यता वितरण गर्छ। अनलाइन पठाउने हो भने गुगलको सहायतामा फर्मडेभलप गरेर अनलाइनबाट पठाउन पनि सक्छन्। अनलाइन प्रणाली सुरु भइसकेको छैन्। भविष्यमा सदस्यताका लागि सफ्टवेयर बनाएर अनलाइन प्रणालीमार्फत पनि सदस्यता लिने अवधारणा बनाइएको छ। तर १४ औं महाधिवेशनमा सदस्यता लिएकाहरुलाई कार्ड बनाएर पठाइने छ।
३७ देशमा जन सम्पर्क समिति भइसकेकाले अन्य देशमा पनि विस्तार गर्ने तयारी भइरहेको उनले जानकारी दिए। तथ्यांकलाई हेर्दा २९ वटा देशमा २९,७०० क्रियाशील सदस्यहरू हुनुहुन्छ। ३७ देशमा जनसम्पर्क समिति छ र केही देशले गठन गर्नको लागि निवेदन दिनुभएको छ। अब छिट्टै नै अरु थप देशहरूमा पनि सम्पर्क समितिको विस्तार गर्छौँ। लगभग चारवटा देशको आइसकेको छ, उनले भने।
