News

सर्वोच्चको फैसलाको एक वर्ष: कानुनको सर्वोच्चता कायम गर्दै डा. घले, धज्जी उडाउँदै बद्री केसी

hollywood Khabar8 months ago8 months ago411 mins

Spread the love

गैरआवासीय नेपाली संघ (एनआरएनए) को एकता महाधिवेशन गराउन नेपालको सर्वोच्च अदालतले परमादेश दिएको बिहीबार एक वर्ष पूरा भएको छ। सर्वोच्चका न्यायाधीश सपना मल्ल प्रधान र नहकुल सुवेदीको संयुक्त इजलासले गत वर्ष चैत २१, २०८० ( अप्रिल ३, २०२४) एकताको महाधिवेशन गराउन परमादेश जारी गरेको थियो।

विनोद कुँवर नेतृत्वको एनआरएनएको तर्फबाट राजेश शमशेर राणाले परराष्ट्र मन्त्रालयसहित एनआरएनए केन्द्रीय कार्यालय लगायतलाई विपक्षी बनाएर दायर गरेको रिटमा सर्वोच्चले फैसला गर्दै एनआरएनएको सम्पूर्ण गतिविधि २०७८ माघ १ को अवस्थामा फर्काउने आदेश दिएको थियो।

सर्वोच्चले ०७८ माघ १ मा सम्पन्न ८१ औँ बैठकले गठन गरेको उच्चस्तरीय समितिलाई यथावत् राख्ने निर्णय गर्दै उक्त समितिमा कुँवर समूहका अध्यक्ष, उपाध्यक्ष र महासचिव क्रमशःविनोद कुँवर, उमेश कुमार पुडासैनी र जानकी गुरुङ तथा कुल आचार्य, डा. बद्री केसी र रविना थापा पनि थप गर्‍यो।एकता महाधिवेशन गराउने जिम्मेवारी शेष घलेलाई दिइयो।

उच्चस्तरीय समितिको पहिलो बैठक बसेर सोको ६ महिनाभित्र संघको सदस्यता, निर्वाचन तथा अधिवेशन प्रतिनिधि छनौट लगायत सम्पूर्ण विवाद समाधान गरेर महाधिवेशन गर्नुपर्ने फैसलामा उल्लेख छ। सोही अनुसार सर्वोच्चको परमादेश र परराष्ट्र मन्त्रालयले दिएको निर्देशनअनुसार आगामी मे ३, ४ र ५ मा काठमाडौँमा एकताको महाधिवेशन गर्ने तयारी भई रहेको छ।

१० औँ र ११ औँ महाधिवेशन खारेज गर्दै २०८० चैत्र २१ गते सर्वोच्च अदालतको परमादेशपछि परराष्ट्र मन्त्रालयले एक पत्र पठाएर एनआरएनए सचिवालयलाई नियमित बाहेक अन्य काम गर्न रोक लगाएपछि ११ औँ महाधिवेशनबाट निर्वाचित भएको दाबी गर्दै आएका बद्री केसी अदालत गए । केसी समूहमा सन्नाटा छायो, केन्द्रीय कार्यालय जानै छाडे। तर २०८१ असार ३१ गते केपी ओली प्रधानमन्त्री नियुक्त भएपछि त्यसको एक महिना भित्र (२०८१ साउन २२ गते) अदालतकै अर्को आदेशले परराष्ट्रको पत्र खारेज गरी दियो। अदालतको दोस्रो फैसलाको अपव्याख्या गर्दै उनी र उनको समूह एनआरएनए केन्द्रीय कार्यालय कब्जा गर्न सफल भयो।

ओली प्रधानमन्त्री भएको आडमा डा.केसीले त्यसपछि उच्चस्तरीय समितिलाई पूरै बेवास्ता गर्दै सचिवालय आफू अनुकूल प्रयोग गर्दै आइरहेका छन्। उनको समूहले सर्वोच्च अदालतको परमादेशको अवज्ञा गर्दै संस्थालाई पूर्ण रूपमा विभाजनको बाटोमा लगिरहेको एनआरएनए अभियन्ताहरूको भनाइ छ। एकताको महाधिवेशन भन्दा पनि आफ्नो समिति वैधानिक रहेको दाबीका साथ उनले सचिवालयलाई कब्जाको शैलीमा काम गरिरहेका छन्। उनले क्षेत्रीय सम्मेलनको नाममा केन्द्रको कोष जथाभाबी खर्च गर्ने र एनसीसीहरुलाई दबाब दिने गर्दै आइरहेका छन् ।

सर्वोच्चको पत्रको अवज्ञा

गत फागुन ११ गते सर्वोच्च अदालतको फैसला कार्यान्वयन निर्देशनालयले गैर आवासीय नेपाली संघको सचिवालयलाई संघको प्रशासनिक कामकारबाही लगायत सबै कागजपत्र उच्चस्तरीय समितिलाई हस्तान्तरण गर्न भन्दै एक पत्र पठायो। उच्चस्तरीय समितिले नयाँ समितिको निर्वाचन गर्ने प्रयोजनको लागि सम्पूर्ण कार्यालय, कर्मचारी प्रशासन, नगद तथा जिन्सी सामान, कागजात, दस्ताबेजहरू लगायत सम्पूर्ण सामान हस्तान्तरण गरिदिन भनी यो निर्देशन दिइएको छ।

तर बद्री केसी नेतृत्वमा रहेको सचिवालयले उल्टै निर्देशनालयको क्षेत्राधिकारबारे प्रश्न उठाउँदै जवाफ दियो। त्यस यता फैसला कार्यान्वयन निर्देशनालयले दोस्रो पटक सात दिन र तेस्रो पटक पाँच दिनको म्याद दिएर सचिवालय उच्चस्तरीय समितिलाई हस्तान्तरण गर्न पत्र लेखी सकेको छ। बद्री केसी र राजेन्द्र राउतले सचिवालय हस्तान्तरण गर्न आनाकानी गर्दै आएका छन्।

अब प्रहरी लगाएर सर्वोच्च अदालतको फैसला कार्यान्वयन गराउनुको विकल्प रहेन। एउटा सामाजिक संस्था कब्जा गर्न साथीहरूले पुटिन शैली अपनाउँदा सिङ्गो एनआरएनएको गरिमा ध्वस्त हुन पुगेको छ,” एक एनआरएनए अभियन्ताले भने।

समिति भित्रकै सदस्य वाधक

उच्चस्तरीय समितिका संयोजक डा. घलेले पटक पटक एकता महाधिवेशनलाई संस्थालाई वैधानिक र प्रजातान्त्रिक विधिमा फर्काउने अवसरको रूपमा लिएको त्यस बाहेक आफ्नो कुनै व्यक्तिगत स्वार्थ नरहेको बताउँदै आएका छन्। सङ्क्रमणकालीन अवस्थामा सर्वोच्चले दिएको परमादेशलाई हामीले पालना गरिरहेका छौँ, त्यस बाहेक अरू कुनै स्वार्थ छैन, उनले भने। नेपाल सरकारका प्रतिनिधिहरूको समेत उपस्थितिमा समितिले १३ ओटा बैठक गरिसकेको छ।

तर, बद्री केसीको प्रभावमा परेका उच्चस्तरीय समितिमै रहेका पूर्व अध्यक्षहरू पनि गत केही साता यता समितिको बैठकमा आउन छाडेका छन्। बद्री केसीलाई सर्वोच्चको फैसला कार्यान्वयन गर्न दबाब दिनुको सट्टा उल्टै केसीले नेतृत्व गरेको भनिएको अवैधानिक समितिको कार्यक्रमहरूमा जाने गरेका छन्। उच्चस्तरीय समितिको सदस्य रहेका केसी भने एक पटक पनि समितिको बैठकमा गएका छैनन्।

एकताको महाधिवेशन रोक्ने प्रयास असफल भए पछि बद्री केसी समूहले अक्टोबर २०२५ मा छुट्टै अधिवेशन गर्ने घोषणा गरेको छ। तर मे २०२५ मा एकता महाधिवेशन सम्पन्न भई सके पछि एनआरएनएकै नाममा अर्को अधिवेशन गर्न नमिल्ने कानुनविद्हरूको भनाइ छ। मे २०२५ मा एकता महाधिवेशन सम्पन्न भई सके पछि नवनिर्वाचित कार्यसमितिले बालुवाटारस्थित सचिवालयबाट काम सुरु गर्छ।

सर्वोच्च अदालतको परमादेश अनुसार एकता महाधिवेशनबाट गठित समितिले नै वैधानिकता पाउँछ। त्यस पछि एनआरएनएकै नाममा अर्को अधिवेशन गर्छु भन्नु अदालतको अवहेलना हुन्छ, त्यो सम्भव छैन, जापानमा बसोबास गर्ने अन्तर्राष्ट्रिय कानुनविद् डा बलराम श्रेष्ठले बताए।

सर्वोच्चको फैसलाको एक वर्ष पुरा हुँदा विधिको शासन मान्ने र विधिको शासनको धज्जी उठाउने दुई ओटा समूह एनआरएनए भित्र देखिएका छन्। एनआरएनहरूको ठूलो समूह सर्वोच्चको परमादेशको कार्यान्वयन गरिनु पर्ने भन्दै एकताको महाधिवेशनको पक्षमा उभिएका छन् भने अदालतको आदेशको खुल्ला अवज्ञा गरिरहेको एउटा सानो समूह जसरी पनि संस्था कब्जा गरिरहने प्रयासमा लागी रहेको देखिन्छ।