काठमाडौं । म्यानमारलाई केन्द्रविन्दु बनाएर शुक्रबार आएको विनाशकारी भूकम्पका कारण भएको जनधनको ठूलो क्षतिप्रति गैरआवासीय नेपाली संघ (एनआरएनए) उच्चस्तरीय समितिले गहिरो दुख व्यक्त गरेको छ। उच्चस्तरीय समितिका अध्यक्ष डा. शेष घलेले उक्त विनाशकारी भूकम्पबाट प्रभावितहरूको उद्धार तथा राहतमा सहयोग गर्न अपिल गरेका छन् ।
भूकम्पको प्रभाव छिमेकी देश थाइल्याण्डमा समेत गम्भीर रूपमा परेको छ। विशेषगरी, त्यहाँ बसोबास गर्ने नेपाली समुदायसहित अन्य प्रभावित नागरिकहरूको सुरक्षाका लागि एनआरएनए थाइल्याण्ड शाखालाई उद्धार तथा राहत कार्यमा सक्दो सहयोग पुर्याउन पनि संयोजक घलेले एक विज्ञप्तिमार्फत आग्रह गरेका छन् ।
गम्भीर घाइतेहरूको शीघ्र स्वास्थ्यलाभको कामना गर्दै एनआरएनए उच्चस्तरीय समितिले उद्धार तथा राहत कार्यक्रम प्रभावकारी बनाउन सम्बन्धित निकायहरूसँग समन्वय गर्ने प्रतिबद्धता जनाएको छ। साथै, संकटग्रस्त क्षेत्रमा राहत सामग्री तथा आवश्यक सहयोग पुर्याउन सम्पूर्ण नेपाली समुदाय, संघसंस्था तथा सहयोगीहरूलाई समितिले आह्वान गरेको छ।
एनआरएनए उच्चस्तरीय समितिले यस प्राकृतिक प्रकोपमा परी ज्यान गुमाउनेहरूप्रति हार्दिक श्रद्धाञ्जली अर्पण गर्दै शोकाकुल परिवारजनप्रति गहिरो समवेदना पनि व्यक्त गरेको छ।
****
उच्तस्तरीय समितिको आधिकारिक फेसबुक पेज https://www.facebook.com/NRNAHLCofficial फ्लो गर्नु भयो भए थप जानकारी पाउनुहुने छ ।
