नेपाल राष्ट्र बैंक,गभर्नरको कार्यालय र पाठयक्रम विकास विकास केन्द्रको, सानोठिमीको समन्वयमा “विद्यालयस्तरका सामाजिक अध्ययन विषयको पाठ्यपुस्तकमा समावेश गर्ने वित्तीय शिक्षा/साक्षरताका विषयवस्तुका बारेमा नेपाल राष्ट्र बैंक, पाठ्यक्रम विकास केन्द्रका पदाधिकारी र सामाजिक विषयका पाठ्यपुस्तक विज्ञ लेखकहरुसँगको अन्तरक्रिया कार्यक्रम” काठमाडौमा सम्पन्न भएको छ।
कक्षा ४ देखि कक्षा १२ सम्मको सामाजिक अध्ययनको परिमार्जित पाठ्यक्रम सार्वजनिक गर्दै सोहीका आधारमा पाठ्यपुस्तक समेत लेखन कार्य थालिएको छ। शैक्षिक सत्र २०८३ बाट कक्षा ५, ८, १० र १२ को पाठ्यपुस्तकहरू एकाइगत रूपमा परीक्षण सुरु हुने पाठ्यक्रम विकास केन्द्रका सामाजिक अध्ययन शाखा अधिकृत सरस्वती भट्टराईले जानकारी दिइन।
नेपाल राष्ट्र बैंकका वरिष्ठ डेपुटी गभर्नर नीलम ढुङ्गानाले पाठ्यपुस्तकमा वित्तीय साक्षरताका विषय समावेश हुँदा व्यवहारिक शिक्षा हुने भन्दै शुभकामना दिए। साथै पाठ्यक्रम विकास केन्द्रका महानिर्देशक युवराज पौडेलले सामाजिक अध्ययन विषयका कक्षा ४ देखि कक्षा १२ सम्म पाठ्यक्रम परिमार्जन गरेर श्रमप्रति सम्मान गर्दै उद्यमशीलता र स्वरोजगार उन्मुख बनाउन खोजेको कुरा बताए। सामाजिक अध्ययनका विज्ञ लेखकहरू पाठ्यपुस्तक लेखनमा जुटेका छन्। परीक्षणका लागि प्रदेशगत रूपमा विद्यालय छनोट गरि प्रारम्भिक अन्तरक्रिया समेत सम्पन्न भैसकेको छ।
