रेडियो सगरमाथाको २९, सामुदायिक उत्तर दायित्व र चौतर्फी प्रसंशा

दक्षिण एसियाको पहिलो स्वतन्त्र प्रसारण सेवा सामुदायिक रेडियो, रेडियो सगरमाथा २९ वर्षमा प्रवेश गरेको छ। शिक्षा ,विज्ञान तथा प्रविधि मन्त्री रघुजी पन्तको प्रमुख आतिथ्यता तथा सञ्चार तथा सूचना प्रविधि मन्त्रालयका सचिव राधिका अर्यालको विशेष अतिथि लगायत महत्वपूर्ण व्यक्तित्वहरूको उपस्थितिमा रेडियो सगरमाथाले आफ्नो प्राङ्गणमा विशेष कार्यक्रम सम्पन्न गरेको छ।

कार्यक्रममा राष्ट्रपति रामचन्द्र पौडेल, प्रधानमन्त्री केपी शर्मा ओली, अर्थ तथा उपप्रधानमन्त्री विष्णु पौडेल, सञ्चार तथा सूचना प्रविधि मन्त्री पृथ्वी सुब्बा गुरुङ, चीनका लागि नेपाली राजदूत कृष्णप्रसाद ओली लगायतका व्यक्तित्वले लिखित शुभकामना पठाउनुभएको थियो।

रेडियो सगरमाथा १०२ थोप्लो ४ मेगाहर्जको २९ औँ स्थापना दिवसमा शिक्षा विज्ञान तथा प्रविधि मन्त्री रघुजी पन्त, सञ्चार तथा सूचना प्रविधि मन्त्रालयका सचिव राधिका अर्याल, त्रिभुवन विश्वविद्यालयका आम सञ्चार तथा केन्द्रीय विभाग प्रमुख डा. कुन्दन अर्याल, अमार्क एसिया प्यासिफिक क्षेत्रीय निर्देशक सुमन बस्नेत, सामुदायिक रेडियो प्रसारक संघ नेपालका अध्यक्ष अर्जुन गिरी, नेपाल प्रेस इन्स्टिच्युटका अध्यक्ष तथा नेपाल वातावरण पत्रकार समूहका पूर्व अध्यक्ष तीर्थ कोइराला, नेपाल वातावरण पत्रकार समूहका उपाध्यक्ष टीकाबन्धनले शुभकामना सन्देश दिनुभयो। 

रेडियो सगरमाथाका स्टेसन म्यानेजर उर्वशी बस्नेतले स्वागत  मन्तव्य राख्दै रेडियो अत्यन्तै संघर्षबाट अगाडि बढिरहेको र आफूले इतिहास जोगाउन हरपल प्रयास गरिरहेको बताउनुभयो। वक्ताले शुभकामना व्यक्त गर्दै रेडियोलाई अनुसन्धान केन्द्रको रुपमा स्थापित गर्नुपर्ने बताएका छन् ।समुदायका आवाजलाई उठाउने विषयदेखि लिएर देशको राजनीतिक परिवर्तनमा समेत स्पष्ट दृष्टिकोण राखेको रेडियो सगरमाथाका अध्यक्ष घमराज लुँइटेलले जानकारी दिनु भयो।

राष्ट्रपति रामचन्द्र पौडेलले दक्षिण एसियाकै पहिलो स्वतन्त्र प्रसारण सेवा एवम् सामुदायिक रेडियोकारुपमा रेडियो सगरमाथाको स्थापना एउटा सुखद् पक्ष रहेको र त्यसयता छापा माध्यमसँगै विशेषत रेडियो, टेलिभिजनजस्ता प्रसारण माध्यमको मुलुकमा विकास भएको बताउनु भयो।

स्थापनायताको झण्डै तीन दशकमा सामुदायिक र राष्ट्रियस्तरमा सामाजिक न्याय, लैङ्गिक समता, विधिको शासन, अभिव्यक्ति स्वतन्त्रता र लोकतान्त्रिक संस्कारको विकास एवम् विस्तारमा सत्यतथ्य सूचना, विचार र सन्देश प्रवाहमा खेल्दै आएको भन्दै रेडियोको भूमिका प्रशंसनीय रहेको स्पष्ट पार्नु भयो। यस्तै 

प्रधानमन्त्री केपी शर्मा ओलीले सञ्चार माध्यमले अब देश विकासका निम्ति नवीनतम् र सिर्जनात्मक रुपमा आम नागरिकलाई सुसूचित गर्नु पर्ने बेला आएको  र अब हाम्रा सूचना र सन्देश रोजगारीको सिर्जनासँगै नवीन प्रविधिको माध्यमबाट देश विकासको गतिलाई अगाडि बढाउँदै आर्थिक समृद्धिको यात्रामा अगाडि बढाउन केन्द्रित हुनुपर्ने बताउनु भयो।यसका लागि रेडियो सगरमाथाले पनि आफ्‌नो तर्फबाट भूमिका खेल्ने छ भन्ने मैले अपेक्षा गरेको छु भन्दै प्रधानमन्त्री ओलीले अहिलेको सरकारले ‘समृद्ध नेपाल, सुखी नेपाली’ को राष्ट्रिय आकांक्षा तय गरेको साथै राष्ट्रको यस आकांक्षालाई पूरा गर्न सरकारले अघि सारेको राष्ट्रिय गन्तव्यलाई पूरा गर्न रेडियो सगरमाथाले आफ्नो ठाउँबाट भूमिका खेल्ने मैले विश्वास लिएको छु। अहिलेको सरकार प्रेस तथा अभिव्यक्ति स्वतन्त्रताप्रति पूर्ण निष्ठावान् छ । त्यसैले प्रेस स्वतन्त्रताप्रतिको हाम्रो निष्ठा व्यवहारसिद्ध छ । समाजको महत्वपूर्ण अङ्गको भूमिका पाएको प्रेस जगतले राष्ट्रियता, लोकतन्त्र, सुशासन र विकासलाई सहयोग पुग्नेगरी जिम्मेवार भूमिका खेल्न सक्नु पर्दछ ।  र व्यवहारिक तहमा कार्यान्वयन गर्दै जानु पर्नेछ। यसका लागि रेडियो सगरमाथाले आफूलाई आगामी दिनमा अझ प्रभावकारी विषयवस्तुबाट नागरिकलाई सूचना दिनेछ भन्ने विश्वास लिएको छु भन्ने शुभकामना दिनु भयो । सञ्चार तथा सूचना प्रविधि मन्त्रालयका सचिव राधिका अर्यालले लोकतन्त्र र गणतन्त्रलाई बलियो बनाउन रेडियो सगरमाथाले महत्वपूर्ण भूमिका निभाएको बतानुभयो ।

शिक्षामन्त्री रघुजी पन्तले लोकतन्त्रमा मिडियाको शक्ति अथाहा हुने हुँदा उपभोगमा गम्भीर भएर लाग्नुपर्ने र नयाँ डिजिटल मिडियाले रेडियोहरुलाई लखेटिरहेको हुँदा त्यसलाई सामना गर्नुपर्ने तर्क राख्नुभयो। आफू रेडियो सगरमाथाको स्थापनाकालदेखि नै जोडिएको र हालसम्म रेडियो सगरमाथाले खेलेको भूमिका अतुलनीय रहेको बताउनुभयो। पुराना र ऐतिहासिक कुरा बिर्सन नहुनेमा पनि उहाँले सचेत गराउनुभयो र रेडियो दुःखसुखको साथी नै भएको स्पष्ट पार्नुभयो। 

विषय वक्ताको रूपमा सहप्राध्यापक डा. कुन्दन अर्यालले रेडियो जनताको भएको र सबै नागरिकहरूले यसलाई अपनत्व लिनुपर्ने, डिजिटल प्रविधिसम्म आइपुग्दा यसलाई प्रतिस्पर्धाको रुपमा लिएर जानुपर्ने र अहिलेको कृत्रिम बौद्धिकतासँग अवसरको रुपमा अगाडि बढ्नुपर्ने बताउनुभयो। प्रेस इन्स्टिच्युटका अध्यक्ष तीर्थ कोइरालाले रेडियो सगरमाथालाई अध्ययन केन्द्रको रुपमा अगाडि बढाउनुपर्ने र यसबाट धेरैले सिक्नुपर्ने धारणा राख्नुभयो।

अमार्क एसिया प्यासिफिकका निर्देशक सुमन बस्नेतले रेडियो सगरमाथाको भूमिकाप्रति प्रशंसा गर्दै समाज परिवर्तनमा रेडियोको भूमिका निरन्तर नै रहने तर्क राख्नुभयो। यस्तै सामुदायिक रेडियो प्रसारक संघका अध्यक्ष अर्जुन गिरीले रेडियो सगरमाथाले रेडियोको लागि बनाएको मानक गौरवमय रहेको प्रतिक्रिया दिनुभयो।