राष्ट्रिय स्वतन्त्र पार्टी (रास्वपा) का उपाध्यक्ष डा. स्वर्णिम वाग्लेले नेपालको चुच्चे नक्सा र सीमाविवादबारे आफ्नो स्पष्ट अडान सार्वजनिक गरेका छन्। उनले विपक्षी दलहरूले फैलाउने सबै ‘फेक न्यूज’ को प्रतिवाद गर्न आवश्यक नभए पनि देशहितसँग प्रत्यक्ष सरोकार राख्ने विषयमा गर्वका साथ बोल्नुपर्ने बताएका छन्।
वाग्लेले सामाजिक सञ्जालमार्फत लेख्दै दुई वर्षअघि भारतकी चर्चित पत्रकार ज्योति मलहोत्रासँगको संवादलाई स्मरण गरेका छन्। उनले त्यतिबेला नै लिपुलेक-लिम्पियाधुरा नेपालको अविभाज्य अंश भएको र यसबारे नेपालभित्र अभूतपूर्व राष्ट्रिय एकता रहेको धारणा राखेको बताए।
उनका अनुसार, सच्चा देशभक्तहरूले प्रखर विदेशी पत्रकारहरूसँग स्पष्ट र अडिग कूटनीतिक दृष्टिकोण प्रस्तुत गर्नै पर्छ। उनले विपक्षी दलका भ्रम सिर्जना गर्ने गतिविधिलाई लक्षित गर्दै, त्यस्ता प्रचारप्रति प्रतिक्रियामा समय खर्च नगरे पनि राष्ट्रिय सार्वभौमसत्ता र सीमा जस्ता संवेदनशील विषयमा दृढ आवाज उठाउनुपर्ने उल्लेख गरे।
