नेकपा (एमाले) भित्र अहिले पूर्वराष्ट्रपति विद्यादेवी भण्डारीको सक्रिय राजनीतिमा पुनः प्रवेश गर्ने विषय सबैभन्दा ठूलो बहसको विषय बनेको छ।
एमाले नेतृत्वले भण्डारीलाई सक्रिय राजनीतिमा आउन रोक लगाउने निर्णय गरेलगत्तै दुई वर्षअघिको एउटा भिडियो क्लिप अहिले भाइरल भएको छ। त्यो क्लिपमा पार्टी अध्यक्ष तथा प्रधानमन्त्री केपी शर्मा ओलीले खुलेरै भनेका छन्–‘विद्यादेवी भण्डारी चाहे एमालेको अध्यक्षसम्म बन्न पाउँछन्।’
दुई वर्षअघि ओलीले पूर्वराष्ट्रपतिले निष्क्रिय भएर बस्नु बेकार भएको र चाहे राजनीतिक रूपमा सक्रिय हुन सक्ने स्पष्ट धारणा दिएका थिए। ओलीले भनेका थिए, ‘पूर्वराष्ट्रपतिको हैसियतले निस्कृय बस्ने भन्दा कुनै हिसाबले सक्रिय हुनुहोस् । सामाजिक कार्यमा सक्रिय हुनुस् या राजनीतिक कार्यमा सक्रिय हुनुस्। राजनीति गर्नु हुँदैन भन्ने त बेकारको कुरा हो।’ त्यति मात्र होइन, ‘विद्या भण्डारीले एमालेको अध्यक्ष बन्न सक्छिन् ?’ भन्ने प्रश्नमा पनि ओलीले सजिलै जवाफ दिएका थिए। ’पूर्वराष्ट्रपति कांग्रेसको अध्यक्ष भएपनि पाउँछन्, अर्को पार्टीको भए पनि पाउँछन्, एमालेको अध्यक्ष भए पनि पाउँछन्। राजनीति गर्ने नहुने भन्ने तर्क बेकार हो।’
तर, रोचक के छ भने अहिले एमालेकै केन्द्रीय कमिटीले भण्डारीलाई पार्टी सदस्यता नवीकरण नगर्ने मात्र होइन, सक्रिय राजनीतिमा आउन पनि रोक लगाउने निर्णय गरेको छ। जुन ओलीकै सक्रियतामा भएको हो ।
एमालेको भदौ २० देखि २२ गतेसम्म हुने दोस्रो विधान महाधिवेशनमा बढी चर्चित बनाएको मुद्दा भने पूर्वराष्ट्रपति भण्डारीकै हो। एमाले अध्यक्ष ओली र महासचिव शंकर पोखरेलले आफ्ना राजनीतिक तथा सांगठनिक प्रतिवेदन तयार पारिरहेका बेला भण्डारी पक्षधर नेताहरू फरक दस्तावेज पेस गर्ने तयारीमा छन्।
वरिष्ठ उपाध्यक्ष ईश्वर पोखरेल, उपाध्यक्षहरू युवराज ज्ञवाली र सुरेन्द्र पाण्डे, स्थायी कमिटी सदस्य कर्ण थापा लगायत नेताहरू खुलेर पूर्वराष्ट्रपति भण्डारीको पक्षमा उभिएका छन्। पूर्वराष्ट्रपति भण्डारी स्वयं महाधिवेशन प्रतिनिधि नरहेकाले उनको समूहलाई ईश्वर पोखरेलले औपचारिक रूपमा प्रतिनिधित्व गर्ने तयारी भइरहेको छ।
भण्डारी पक्षधर नेताहरू भन्छन्, ‘अध्यक्षज्यूले आफैँ भनेको कुरा किन बिर्सनु भयो ?’ पूर्वराष्ट्रपतिले राजनीति गर्न नहुने भन्ने धारणाले गणतन्त्र बलियो नहुने बरु विभिन्न अनुभवसहितको राजनीतिक योगदान अझ प्रभावकारी हुने उनीहरुको तर्क छ । एमालेको विधान महाधिवेशन यसपालि विवादमै रुमल्लिने हो कि भन्नेहरु पनि छन्। भण्डारी पक्षधरहरू फरक प्रतिवेदनमार्फत ओली नेतृत्वलाई चुनौती दिन तयारीमा छन् । कतै र केहि गरे पनि नसकेपछि अध्यक्ष ओलीले एमालेले यही भदौ १३ गते बोलाएको १० औँ केन्द्रीय कमिटी बैठक स्थगित गराएका छन्।
