नेपालीहरुले प्रत्येक वर्ष भाद्रकृष्ण औँसीका दिनलाइ बाबुको मुख हेर्ने दिन तथा कुशे औँसी भनेर मनाउने गर्दछन। यस दिन पुरानो कुश सेलाएर नयाँ कुश भित्र्याउने दिन मानिन्छ।
यो औंसीका दिन उखेलिएको कुश वर्षभर प्रयोग गर्न सकिने र अरु दिन उखेलिएको कुश त्यसैदिन मात्र उपयोग गर्न सकिने शास्त्रीय मान्यता रहेको धर्मशास्त्रविद्हरुको भनाइ रहेको छ। त्यसैले यस दिनलाइ कुशे औंसी भनिएको हो।
नेपाली समुदायमा आजको दिन पितृहरुको मुख हेरेर उपहार दिने, मिष्ठान्न खुवाउने चलन छ। बाबु नहुने सन्तानहरुले विभिन्न पवित्र स्थानमा गई आफ्ना बाबुको नाममा तर्पण, पिण्डदान तथा श्राद्ध गरी सिदा दिन्छन्। यस दिन काठमाडौँको गोकर्णेश्वर महादेव मन्दिर परिसरमा विशेष मेला लाग्छ। यसैले आजको औँसीलाई गोकर्णे औँसीका नामले पनि चिनिन्छ।
