राष्ट्रिय स्वतन्त्र पार्टी (रास्वपा) की केन्द्रिय सदस्य तथा सांसद मेडिकल डाक्टर तोसीमा कार्कीले आफ्नो दावी रिक्त रहेको सहमहामन्त्री पदमा नरहेको तर कसैको पनि मनोनयन रिति-बिधि अनुसार गर्नुपर्छ, यो नै अन्तरपार्टी लोकतन्त्र हो भनेकी छन्।
उनले रास्वपाको बिहिबारको केन्द्रिय समिति बैठकमा रिक्त रहेको सहमहामन्त्री पदको प्रस्तावित मनोनयनबारे आफ्नो धारणा आन्तरिक रुपमा राखेकी थिइन। उनको त्यो धारणा केवल दलभित्र रिति-बिधि अनुसार अन्तरपार्टी लोकतन्त्र अनुसार मनोनयन गर्नुपर्छ भन्ने थियो। आफूलाइ मनोनयन गर्नुपपर्छ भन्ने थिएन तर त्यसलाई अन्यथा बनाएर बाहिर आएपछि उनको निजी सचिवालयको संचार समूह र आफ्नो फेसबुक वालमा धारणा प्रष्ट रुपमा राखेकी छन्।
डा. कार्कीको फेसबुकवालबाट तथा संचार समूहबाट आएको प्रति जस्ताको तस्तै
केन्द्रिय समितिमा मैले विधिको प्रश्न उठाएको हुँ व्यक्तिको विरोध गरेको होईन। साथै, रिक्त सह-महामन्त्रीमा मेरो दावी होईन।
हिजोको केन्द्रीय समिति बैठकमा एजेन्डामै नभएको कुरा निर्णय प्रस्ताव आएपछि हामीले अस्वीकार गरेका हौँ। पार्टीले रिक्त रहेको सह-महामन्त्रीको पदमा थप गृहकार्य सहित विधिसम्मत रुपले इच्छुक-योग्य महिलाहरुबाट नियुक्ति गर्नुपर्छ भन्ने मेरो मत हो।
केन्द्रीय समिति बैठकमा भएको छलफलको नालीबेली सबै बाहिर आउन जरुरी छैन। पार्टी विधिपूर्वक चल्न र पार्टीभित्रको लोकतान्त्रिक पद्धति बलियो बनाउन केन्द्रीय समिति बैठकहरूमा घनिभूत छलफल र संवाद हुनेगर्छ र त्यो जरुरी पनि छ।
केहि संचार माध्यम र सामाजिक सन्जालमा मलाई जोडेर खबरहरु जसरी आयो, त्यसमा मैले पार्टी पंक्ति र आम शुभेच्छुकहरुलाई स्पष्ट पार्नुपर्छ भन्ने लाग्छ। मैले सहमहामन्त्रीको पदमा प्रस्तावित व्यक्तिको विरोध जनाएको होइन। केन्द्रीय समितिमा एजेन्डा अनुरुप राखिने प्रस्ताव र निर्णयको विधि सच्याउन आग्रह गरेको हो।
राम्रो कुरो, यसलाई पार्टी सचिवालय र पदाधिकारीहरूले सकारात्मक रूपमा लिनुभयो र एजेन्डा फिर्ता गरी थप गृहकार्य साथ आउने निर्णय भएको छ। यसकारण पनि मैले गर्वका साथ भन्ने गरेको छु, राष्ट्रिय स्वतन्त्र पार्टी आन्तरिक लोकतन्त्र र विधिमा विश्वास गर्ने पार्टी हो।
कृपया, कसैले पनि गलत भास्य बनाएर मलाई पद-लोलुप जस्तो नदेखाइदिनु होला। यो सह-महामन्त्री पदमा मेरो कुनै दाबी छैन। म आम जनता समक्ष पुगेर चुनाव लडेर सांसद निर्वाचित भएको हुँ। पार्टीभित्र पनि अधिवेशनमा पदाधिकारीहरु निर्वाचित भएरै आउनुपर्छ भन्ने नीति/निर्णय स्थापित गर्न विधान संशोधनमा मैले खेलेको भूमिकाबारे यहाँहरु जानकार नै हुनुहुन्छ।
त्यसैले मैले कुनै पदमा दावी गर्नुपरे म चुनाव मार्फत नै आउनेछु। राष्ट्रिय स्वतन्त्र पार्टीलाई यहाँहरुले गरिरहनुभएको माया, शुभेक्षा र शुभाशिर्वादको लागि सधैँ आभारी छु। धन्यवाद।
