राष्ट्रिय स्वतन्त्र पार्टी (रास्वपा) को सेप्टेम्बर २४, बुधबार बसेको केन्द्रीय समिति बैठकले जेनजी आन्दोलनको छानबिन प्रतिवेदन नआएसम्म पूर्व प्रधानमन्त्री, गृहमन्त्री र सञ्चारमन्त्रीलाई राजनीतिक गतिविधिमा सहभागी हुन रोक लगाउन नेपाल सरकारको ध्यानाकर्षण गराउने भएको छ। निर्णय अन्सुआर निवर्तमान प्रधानमन्त्री केपी शर्मा ओली र ओली सरकारका गृहमन्त्री रमेश लेखक, सञ्चारमन्त्री पृथ्वीसुब्बबा गुरुङलाई छानबिन प्रतिवेदन नआएसम्म राजनीतिक क्रियाकलापमा सहभागी हुन बन्देज लगाउन सरकारलाई ध्यानाकर्षण गराउने निर्णय गरेको छ।
साथै रास्वपाले भदौ २४ गते नख्खु कारागार लगायत अन्य केही स्थानहरूमा भएका घटनाहरूमा पार्टी सदस्यहरूको सम्भावित संलग्नता भएको नभएको जनाउँदै सो सम्बन्धमा सत्यतथ्य पत्ता लगाउन छानबिन समिति गठन गर्ने निर्णय समेत गरेको छ। बैठक पछि रास्वपा प्रवक्ता मनिष झाद्वारा जारी गरिएको विज्ञप्तिमा उल्लेख गरिएको छ।
वि.सं. २०८२ असोज ८
ने.सं. ११४५ कौलाथ्व तृतीया
विज्ञप्ति
राष्ट्रिय स्वतन्त्र पार्टीको असोज ७ र ८ गते सम्पन्न केन्द्रीय समितिको बैठकमा समसामयिक राजनीतिसँग सम्बन्धित केन्द्रीय सदस्यहरुले राख्नुभएका मौखिक धारणाहरु एवं लिखित प्रस्तावहरुमाथि वृहत् छलफल पश्चात् देहायका निर्णयहरु गरिएको सम्बन्धित सबैको जानकारीका लागि प्रकाशित गरिएको छ ।
१. राष्ट्रिय स्वतन्त्र पार्टीको केन्द्रीय विस्तारित बैठक आगामी कात्तिक १४ र १५ गते गर्ने । उक्त विस्तारित बैठकमा पार्टीको प्रथम राष्ट्रिय महाधिवेशनका विषयमा समेत छलफल गर्ने ।
२. भदौ २४ गते नख्खु कारागार लगायत अन्य केही स्थानहरुमा भएका घटनाहरुमा पार्टी सदस्यहरुको सम्भावित संलग्नता भएको नभएको सम्बन्धमा सत्यतथ्य पत्ता लगाउन छानबिन समिति गठन गर्ने ।
३. भदौ २३ र २४ गते भएको आन्दोलनमा राज्य पक्षबाट भएको दमन र हिंसाको छानबिन प्रतिवेदन नआएसम्म तत्कालीन सरकारका प्रधानमन्त्री, गृहमन्त्री र सञ्चार मन्त्रीलाई राजनीतिक क्रियाकलापमा सहभागी हुन बन्देज लगाउन नेपाल सरकारलाई ध्यानाकर्षण गराउने ।
४. वि सं २०४६ सालदेखिको उच्च सार्वजनिक ओहदामा रहेका व्यक्तिहरुको सम्पत्ति छानबिन गर्न सरकारलाई दबाब दिने ।
५. जेनजी आन्दोलनका क्रममा नेताहरुको निवासमा भेटिएका अवैध नगद साथै चलअचल सम्पत्ति सम्बन्धी सत्यतथ्य छानबिन गर्न नेपाल सरकारको ध्यानाकर्षण गराउने ।
६. जेनजी उमेर समूहका युवाहरु लगायत नयाँ शक्तिहरु, अभियन्ताहरुसँग आवश्यक संवाद एवं सहकार्यका लागि पार्टी केन्द्रीय सदस्य श्री पुकार बमको संयोजकत्वमा ५ सदस्यीय कार्यदल गठन गर्ने ।
७. फागुन २१ गते हुनगइरहेको निर्वाचनका लागि रास्वपाको वाचापत्र तयार गर्न पार्टी उपसभापति डा. स्वर्णिम वाग्लेको संयोजकत्वमा ७ सदस्यीय वाचापत्र लेखन समिति गठन गर्ने ।
मनिष झा
प्रवक्ता
