काठमाडौं।पशुपति विकास कोषको सदस्य सचिव पदमा नारायण भण्डारीको नाम सिफारिस गरिएको छ।हालै सम्पन्न बैठकले संस्थाको व्यवस्थापन र कोष सञ्चालनलाई अझ प्रभावकारी बनाउनुपर्ने निष्कर्ष निकाल्दै भण्डारीलाई अग्रस्थानमा राखेर नाम सिफारिस गरेको हो।
जे एन्जि आन्दोलनमा सक्रिय भूमिका निर्वाह गरेका भण्डारीलाई सो पदमा पुर्याउन आन्दोलनकै नेताहरूले समेत पहल गरेका थिए। उनका साथ अन्य नामहरू पनि सिफारिसमा परे तापनि भण्डारी सबैभन्दा अगाडि परेका छन्।
सदस्य–सचिव पदमा नियुक्त भएपछि उनले कोषका नीतिगत, आर्थिक तथा प्रशासनिक कार्यहरूको संयोजन गर्ने, समितिका बैठक एजेण्डा तयारी गर्ने र कार्यान्वयन सुनिश्चित गर्ने, पारदर्शी वित्तीय व्यवस्थापन गर्ने तथा आवश्यक प्रतिवेदन समितिमा पेस गर्ने जिम्मेवारी पाउनेछन्।
कतारमा रहँदा उनले गैरआवासीय नेपाली संघ (एनआरएनए) कतारको विभिन्न पदमा रहेर सफल कार्यकाल बिताएका थिए । त्यहाँ रहँदा उनले नेपाली समुदायलाई एकताबद्ध बनाउन, सामाजिक तथा सांस्कृतिक गतिविधि सञ्चालन गर्न र श्रमिक अधिकारको संरक्षणमा सक्रिय भूमिका खेलेका थिए। यसै कारण भण्डारीलाई “आशालाग्दो युवा समाजसेवी” को रूपमा हेरिन्छ।
सिफारिसमा परेको विषयमा भण्डारीले प्रतिक्रिया दिँदै आफूलाई जिम्मेवारी दिने हो भने पशुपति विकास कोषलाई पारदर्शी व्यवस्थापन, आधुनिक प्रविधिको उपयोग, धार्मिक–सांस्कृतिक सम्पदा संरक्षण र तीर्थयात्रीमैत्री सुविधा विस्तारमार्फत नमुना संस्थामा रूपान्तरण गर्ने संकल्प व्यक्त गरेका छन । उनले पशुपतिमार्फत धेरै पर्यटक भित्र्याउन सकिने बताए ।
पशुपति क्षेत्रलाई विश्वस्तरीय धार्मिक तथा सांस्कृतिक केन्द्रका रूपमा स्थापित गर्न कोषको भूमिका महत्वपूर्ण हुने भएकाले भण्डारीको नाम सिफारिसलाई विभिन्न तहमा सकारात्मक दृष्टिले हेरिएको छ।
