एमालेको गत केन्द्रिय कमिटी बैठकद्वारा अध्यक्ष केपी शर्माओलीले पूर्व राष्ट्रपति विद्यादेवी भण्डारीलाइ रोक लगाए पनि उनि रोकियेकी छैनन। उनले आफ्नो सक्रियता थप बढाएकी छन्। शनिबार काठमाडौंका युवाहरुसँग सडक–साक्षात्कार गरेकी भण्डारी त्यसको दुई दिनपछि सोमबार विराटनगर पुगेकी हुन्।
एमालेको सक्रिय राजनीतिमा फर्किएको घोषणा गरेकी भण्डारीलाई एमाले नेतृत्व पँक्तिले पार्टीमा प्रतिवन्ध लगाउने निर्णय गरेको छ। एमाले अध्यक्ष तथा प्रधानमन्त्री केपी शर्मा ओलीको चुनौतीका रुपमा खडा भएकी भण्डारीले त्यसको बावजुदपनि उनले आफ्नो सक्रियतालाई झनै बढाएकी छिन् ।
सोमबार विराटनगर पुगेकी भण्डारीलाई कोशी प्रदेशकी राज्यमन्त्री सिर्जना राई एयरपोर्टमा स्वागत गर्न पुगेकी थिइन । यसअघि काठमाडौंमा हरितालिका विशेष कार्यक्रम आयोजना गरेको मोरङ सेवा समाजको निम्तो मान्न पुगेकी भण्डारीले नारी शक्तिको महिमाबारे चर्चा गरेकी थिईन् । उनले आफू जनताको बीचमा जाने घोषणा गरेकी छिन् । पूर्व राष्ट्रपति भण्डारीले आफू अझै पनि नेकपा एमालेकै कार्यकर्ता रहेको बताइन ।उनले आफूलाई एमालेसँगको पुरानो संगठनात्मक नाता कसैले खोस्न नसक्ने दाबी गरिन । सोमबार विराटनगर विमानस्थलमा पत्रकारहरूसँग कुरा गर्दै भण्डारीले भनिन्, ‘म नेकपा एमालेकै कार्यकर्ता हुँ, एमालेकै तर्फबाट राष्ट्रपति निर्वाचनमा भाग लिएर निर्वाचित भएकी हुँ। आज पनि म त्यही हुँ। पार्टीले औपचारिक रूपमा के निर्णय गरेको छ, मलाई थाहा छैन, तर मेरो संगठनात्मक पहिचान एमालेकै हो ।’
उनले एमालेको केन्द्रीय समितिले सदस्यता खोसेको भन्ने हल्ला असत्य भएको दाबी गरिन् । ‘३५–३६ वर्षदेखि मैले पार्टीसँग निरन्तर यात्रा गरेकी हुँ’, उनले भनिन्, ‘राष्ट्रपतिको कार्यकाल सकिएपछि पनि मैले सदस्यता नवीकरण गरेको छु । यो अधिकार कसैले खोस्न सक्दैन ।’ पार्टीले उनलाई केवल ‘पूर्व राष्ट्रपति’ का रूपमा मात्र लिने भन्ने अभिव्यक्तिप्रति भण्डारीले प्रत्यक्ष टिप्पणी नगरे पनि आफू कुनै पनि छलफलका लागि खुला रहेको बताइन् । उनले भनिन्, ‘जनताले निर्वाचित गरेका कोही पनि व्यक्ति त्यो पदमा जान सक्छन् र कार्यकालपछि पुनः सामान्य नागरिक जीवनमा फर्किन सक्छन् ।’
राजतन्त्र र गणतन्त्र फरक रहेको भन्दै उनले पद सकिएपछि पुरानो काममा फर्कन सकिने जिकिर गरिन् । राष्ट्रपतिको पद आवधिक हुने र कार्यकाल सकिएपछि जुनसुकै नागरिक पनि आफ्नो सामाजिक वा राजनीतिक जीवनमा फर्कन सक्ने भन्दै उनले भनिन्, ‘राजतन्त्र र गणतन्त्र फरक हो । यो आवधिक हुन्छ । जोसुकै पनि जनताको सहभागिताले निर्वाचित भएर आउन सक्छ । कार्यकाल सकिएपछि आफ्नो पुरानै जीवनमा फर्कन सक्छन् ।’ गणतन्त्र र राजतन्त्रमा फरक–फरक संवैधानिक व्यवस्था हुने र राजा भनेको व्यक्ति भएको तर राष्ट्रपति भनेको पद भएकाले राजनीतिमा फर्कन कुनै बाधा नभएको उनको तर्क छ ।
भण्डारीले गत साउन १४ गते एमालेको सक्रिय राजनीतिमा आउने घोषणा गरेकी थिइन् । उनले केपी ओलीबाट एमालेको नेतृत्व हुन नसक्ने भन्दै अब अध्यक्षको दाबेदारी गर्ने समेत बताएकी थिइन् । त्यसलगत्तै बसेको नेकपा एमालेको केन्द्रीय समिति बैठकले उनको नविकरण भइसकेको पार्टी सदस्यता नै खारेज गरेको थियो ।
उनलाई सक्रिय राजनीतिमा आउन रोक लगाउने निर्णय एमालेले गरेको भएपनि भण्डारीले आफ्नो अभियान नरोकिने बताउँदै आएकी छन् । भण्डारीले आफ्नो सदस्यता पार्टीको बिधान र प्रक्रिया अनुसार नविकरण भइसकेकको जिकिर गरेकी छन् । राष्ट्रपतिमा निर्वाचित हुँदा पनि पार्टीले विशेष निर्णय गरेर पठाएको र कार्यकाल सकिएपछि आफूले विधिवत रूपमा सदस्यता नवीकरण गरेको उनको भनाइ छ।
आफू आलोचनाभन्दा मुक्त नरहेको भन्दै उनले गुट चलाएको आरोपको प्रतिवाद गरेकी छन् । ‘मलाई गुट चलाउन आउँदै आउँदैन’ उनले भनिन्, ‘मदन भण्डारी फाउन्डेसनमाथि लगाएको आरोपबारे पार्टीका नेताहरूलाई नै सोध्नु होला ।’ कांग्रेस नेता डा. शेखर कोइरालासँग भएको भेटलाई लिएर सोधिएको प्रश्नमा भण्डारीले त्यसलाई सामान्य रूपमा लिनुपर्ने बताइन् । ‘शेखर कोइरालासँग मेरो भेट भएको हो । उहाँ पनि मोरङ विराटनगरकै हो । हामी पनि त्यहीँ जन्मिएर हुर्केको हो’ उनले भनिन्, ‘त्यो भेटेको कुरालाई यस्तो एकदमै ठूलो हाउगुजीको रूपमा लिनुपर्ने म ठान्दिनँ ।’ वाम एकताको सम्भावनाबारे सोधिएको प्रश्नमा भण्डारीले वामपन्थी पार्टीहरू धेरै भएकाले सम्भावना नरहेको भन्न नमिल्ने बताएकी छन् । तर, त्यसलाई बलियो रूपमा नदेखेको उनको भनाइ छ । ‘सम्भावनै छैन भनेर मैले भन्न पनि मिलेन । तर, सम्भावना म त्यति बलियो देख्दा पनि देख्दिनँ’ उनले भनिन् ।
