.png)
-तीर्थराज अधिकारी,गोरखा, लप्सीबोट; हाल:सरस्वतीनगर, काठमाडौँ-६, जुन ११, २०२२
उता - सडकको पेटीमा
कहिले गुन्गुनाउँदै
कहिले मुस्कुराउँदै
कहिले रुँदै
कहिले गाली गर्दै
कहिले फोहोर चाट्दै
वस्त्रको ठेगानविनाको
मानसिक सन्तुलन गुमेको
कुनै मान्छे हिँडिरहेको छ ।
यता- बीच सडकमा
पोसाकै पोसाकले सजिएर
खुस्बु छाउँदै
उचाइको अभिमानले
पैदल यात्रीहरूमा
हिलो छ्याप्दै
धुवाँ फ्याँक्दै
कान चिर्दै
आँखा तर्दै
चिल्लो गाडीमा
अर्को कुनै मान्छे गुडिरहेको छ
तर विचारको धरातलमा
पेटी र बीच सडकमा
खै ! के फरक छ र ?
चितुवा जङ्गलको
बस्तीमा अनायास छिरेर
नङ्ग्रा र दाह्राहरूको प्रदर्शन गर्दै
जीवन रित्याउने अवसर खोजिरहेको छ
मान्छेकै रूपमा उस्तै - ऊ
खुँडा/ खुकुरी
बन्दुक/ पेस्तोल बोकेर
बेरोकटोक मान्छेलाई खेदिरहेको छ
भोकको यस समानतामा
खै ! के फरक छ र ?
धाँजा फाटेको जमिनको आकाशमाथि
सुख्खा बादल गर्जिरहेको छ
बर्सिए त्यो कतै असिना भएर बर्सिन्छ
बर्सिए त्यो कतै चट्टान भएर बर्सिन्छ
उसरी नै - ऊ
यस जमिनको आकाशमाथि
जतिजति उडोस्
जमिनमा छायामात्र पर्छ
जमिनमा कालो मात्र झर्छ
त्यो खुख्खा बादल र उसमा
खै ! के फरक छ र ?
व्यवसायी बगरे
गर्धन रेटेर
मायाले तेलबेसार दल्दै !
गर्वले मासुका टुक्रा- टुक्रालाई
पैसामा बदल्छ
उस्तै - ऊ लासमाथि अबिर छर्किँदै
बहादुरीको - जीवनवृत्त - लेख्छ
नियतिको यस समान यात्रामा
खै ! के फरक छ र ?
**तीर्थराज अधिकारीका अरु कविता**
सिफारिस
तिमी मेरो जिन्दगी-भिडियो
एनआरएनएमा कुन बाटो होइन मुक्त राजनीतिको मूल बाटो
हेड्स नेपालद्वारा मानसिक स्वास्थ्यको क्षेत्रमा काम गर्ने हेड्सको प्रति...
रूपान्तरण!