News

कांग्रेसमा अन्तर पार्टी प्रतिसोध भयो: नेता कोइराला

hollywood Khabar5 months ago5 months ago641 mins

Spread the love

नेपाली कांग्रेसको शेखर कोइराला पक्षका नेताहरुले केन्द्रीय अनुशासन समितिले नेताहरुमाथि गरेको कारबाही प्रतिशोधपूर्ण रहेकाले प्रतिवाद गर्ने निष्कर्ष निकालेका छन्। बिहीबार काठमाडौंमा बसेको कोइराला पक्ष नेताहरुको बैठकले अनुशासन समितिले गरेको कारबाही अवैधानिक र प्रतिशोधपूर्ण रहेकाले प्रतिवाद गर्ने निष्कर्ष निकालेको कांग्रेस नेता गुरुराज घिमिरेले जानकारी दिएका हुन्।

पार्टीको सदस्यउपर उजुरी परेको ६ महिनाभित्र अनुशासनको कारबाही टुंग्याइसक्नुपर्नेमा अढाइ वर्षपछि कारबाहीको निर्णय बाहिर आउनु आफैमा पार्टी विधान र नियमावलीविपरीत रहेको उनले बताए। त्यस्तै घिमिरेले पार्टीभित्रको अर्को पक्षलाई किनारा लगाउने गरि पक्षपातपूर्ण र गुट प्रेरित ढंगले कारवाही भएको आरोप लगाए। यस बिषयमा शेखर कोइराला लगायतका नेताहरुले सभापतिसंग कुरा गर्ने घिमिरेले बताए। उनले पार्टीभित्र प्रतिस्पर्धी समूहलाई पाखा लगाउने प्रयत्नको सालिन र सभ्य रुपबाट प्रतिवाद हुने धारणा राखेका छन्।

केन्द्रीय समितिको बैठकपश्चात् पार्टी सभापति, उपसभापतिद्वय र महामन्त्रीद्वय पाँच जना बसेर अहिले अनुशासन समितिको कुनै पनि निर्णय बाहिर नल्याउने भन्ने सहमतिविपरीत कारवाहीको निर्णय आएको कोइराला पक्षको भनाइ छ।

यसअघि बुधबार कांग्रेस केन्द्रीय अनुशासन समितिले स्थानीय तह, प्रदेश र प्रतिनिधिसभा निर्वाचनमा पार्टीका वा पार्टीले समर्थन गरेको उम्मेदवारबिरुद्ध असहयोग गरि पराजित गराउने गलत मनशायका गतिविधि गरेको भन्दै पार्टीका केहि नेता तथा कार्यकर्तालाई निस्काशन र निलम्वन गरिएको निर्णय सहितको बिज्ञप्ती सार्वजनिक गरेको थियो।