ललितपुर,नेपाल विद्यार्थी संघले स्ववियु निर्वाचनका लागि छलफल, अन्तरक्रिया र भेटघाटलाई तीव्र पारेको छ। यस क्रममा नेपाल विद्यार्थी सङ्घ ललितपुर जिल्ला कार्यसमितिले आज चैत ५ गते हुने स्ववियु निर्वाचनमा नेविसंघका उम्मेदवारहरूलाई विजयी गराउन ललितपुर जिल्ला भरिका क्याम्पस विद्यार्थी संगठनहरूको नेतृत्व र पार्टी नेतृत्वबीच छलफल र अन्तरक्रिया गरेको छ।
नेपाली कांग्रेस ललितपुरका जिल्ला सभापति जितेन्द्रकुमार श्रेष्ठ सहित जिल्लाका पार्टी पदाधिकारी एवं भातृ तथा सुभेचुक संस्थाका प्रमुखहरु र क्याम्पसका इकाइ सभापति तथा आसन्न स्ववियु निर्वाचनका उम्मेदवारहरू पार्टी कार्यालय नखिपोटमा भेला भई अन्तरक्रिया र छलफल गरेका हुन्।
नेपाली कांग्रेस जिल्ला कार्यसमिति ललितपुरले स्ववियु निर्वाचनलाई लक्षित गरेर पूर्व विद्यार्थी नेता समेत रहेका नेपाली काङ्ग्रेस ललितपुरका जिल्ला सचिव एवं कोन्ज्योसोम गाउँपालिकाका उपप्रमुख राजन प्रसाद घिमिरेलाई संयोजक समेत तोकेको छ।
छलफलमा नेपाल विद्यार्थी सङ्घका जिल्ला सभापति सरोज घोरासैनीले स्ववियु निर्वाचनमा नेविसङ्घबाट बनेका उम्मेदवार सर्वसम्मत रुपमा चयन भएको बताए। अध्यक्ष घोरासैनीले निर्वाचन हुने नौवटा क्याम्पसहरू मध्ये दुईवटा क्याम्पसमा अखिल क्रान्तिकारी (माओवादी )र अनेरास्ववियु(एमाले) सँग साझेदारीमा उम्मेदवारी दर्ता गरिएको र बाँकी सातवटामा नेविसङ्घको एकल प्यानल दर्ता भएको बताए। उनले ललितपुरमा नेविसंघ भित्र कुनै पनि विवाद नरहेको स्पष्ट पारे।
निर्वाचन प्रक्रिया सुरु नगरेका कलेजहरूमा पनि तत्काल निर्वाचनको प्रक्रिया अघि बढाउन संयुक्त विद्यार्थी संगठनले प्रशासनलाई विज्ञप्ति लेख्दै ध्यानाकर्षण गरेको अध्यक्ष घोरासैनीले बताए। छलफलमा क्याम्पसका इकाई सभापतिहरूले क्याम्पसभित्र इकाइले गरेका गतिविधि र निर्वाचनमा आफ्नो पोजिसनका अवस्थाबारे जानकारी गराएका थिए।
पाटन संयुक्त क्याम्पसका इकाइ सभापति तारा शर्माले नेविसङ्घ एक हुँदा यसपटक पनि नेविसङ्घले नेतृत्व पाउने बताए। करिब ७५०० जना विद्यार्थी भोटर रहेको पाटन संयुक्त क्याम्पसमा नेपाल विद्यार्थी सङ्घबाट रोहित कपालीले उम्मेदवारी दिएका छन्। त्यस्तै पुल्चोक इन्जिनियरिङ कलेजमा ऋषभ गिरीले उम्मेदवारी दिएका छन्। उक्त कलेजमा ४००० विद्यार्थीले मतदान गर्दैछन्।
कान्तिपुर इन्जिनियरिङ कलेजमा नेपाल विद्यार्थी सङ्घका युवराज कार्कीले उम्मेदवारी दिएका छन्। उक्त कलेजमा ८४० जना विद्यार्थीले मतदान गर्दैछन्। त्यस्तै क्याटफोर्ड कलेजमा आदित्य खड्काले उम्मेदवारी दिएका छन्। उक्त कलेजमा ५५५ जनाले मतदान गर्दैछन्। सगरमाथा कलेजमा विद्यार्थी सङ्घबाटै नवीनबहादुर चन्दले उम्मेदवारी दर्ता गराएका छन्। उक्त कलेजमा ४८३ जना विद्यार्थी भोटर रहेका छन्।
त्यस्तै महालक्ष्मी क्याम्पसमा नवीन दनुवारले उम्मेदवारी दर्ता गरेका छन्। उक्त क्याम्पसमा १५० जना विद्यार्थीले मतदान गर्नेछन्। नेशनल कलेजमा नेविसंघ र अखिल क्रान्तिकारी (माओवादी) को सयुक्त प्यानल दर्ता भएको छ। उक्त कलेजमा नेविसंघले सचिवमा दिवश पौडेललाई अघि सारेको छ। ७०९ मतदाता रहेको कलेजमा कोषाध्यक्ष सहितका पदमा नेविसंघले उम्मेदवारी दर्ता गरेको छ।
त्यस्तै हिमालयन कलेजमा नेविसंघले अनेरास्ववियु (एमाले) सँग तालमेल गरी उपसभापतिमा अनुस महर्जनले उम्मेदवारी दर्ता गरेका छन्। उक्त कलेजमा नेविसंघले सचिव, कोषाध्यक्ष सहितका पदमा उम्मेदवारी दिएको छ। उक्त कलेजमा १२१८ विद्यार्थी भोटर रहेका छन्।
छलफलका क्रममा संगठनका गतिविधि र स्ववियु निर्वाचनको पछिल्लो अवस्थाको जानकारीपछि बोल्दै निर्वाचन जिल्ला सभापति जितेन्द्रकुमार श्रेष्ठले स्ववियु निर्वाचनमा होमिन जिल्ला कार्यसमितिका पदाधिकारी, भातृ तथा शुभेच्छुक संस्था, नेता कार्यकर्तालाई अपिल गरेको छन्। अन्तरविरोध र तिक्ततालाई अन्त्य गरी एक ढिक्का भएर नेविसंघका उम्मेदवारलाई मतदान गर्न र विजयी गराउन पार्टी पंक्ति तयार रहेको सभापति श्रेष्ठले बताए। सभापति श्रेष्ठले यसपटक नेविसङ्घ भित्र कुनै विवाद नरहेकाले नेविसङ्घको जित सुनिश्चित रहेको बताए।
छलफलमा नेपाली कांग्रेस ललितपुरका उपसभापति सुदर्शन घिमिरे, जिल्ला समन्वय समिति ललितपुरका प्रमुख ऋषिदेव फुयाँल,कोषाध्यक्ष दिलमन खड्का,प्रवक्ता सन्तोषराज केसी, क्षेत्रीय सभापतिहरू सुन्दरमान थिङ (१), महेश खड्का (२) महेश्वर थापा (३) पूर्व जिल्ला सचिव रविन शर्मा, प्रदेश सभापतिहरू, पालिका सभापतिहरू, नेपाल विद्यार्थी सङ्घका केन्द्रीय सदस्यहरू, नेपाल महिला सङ्घका अध्यक्ष गीता सत्याल, निजामती कर्मचारी युनियनका अध्यक्ष मुन चौलागाई, शिक्षक संघका अध्यक्ष सुरेश घिमिरे, प्रेस युनियन ललितपुरका अध्यक्ष केदारनाथ दाहाल लगायत विद्यार्थी नेताहरूको उपस्थिति रहेको थियो।
