नेपाली कांग्रेसले दल फुटाउने नियतले पार्टीको विधान विपरीत आह्वान गरिएको भनिएको विशेष महाधिवेशन अवैधानिक भएकाले त्यस्तो भेला तत्काल रोक्न निर्देशन गरेको छ। कांग्रेसका कार्यवाहक सभापति पूर्णबहादुर खड्काको सभापतित्वमा जनवरी ८, २०२६ बिहीबार ललितपुरस्थित पार्टीको केन्द्रीय कार्यालयमा बसेको केन्द्रीय कार्यसम्पादन समितिको बैठकले उक्त निर्णय गरेको हो।
बैठकमा कार्यवाहक सभापति खड्काले प्रस्तुत गरेको प्रस्ताव अनुसार केन्द्रीय कार्यसम्पादन समितिको बैठकले नियमित रुपमा १५ औँ महाधिवेशनको कार्यतालिका अनुसार अघि बढ्ने निर्णय गरेको छ। २०८२ मंसिर १५ गते केन्द्रीय कार्यसमितिले महाधिवेशन बैसाखमा गर्ने निर्णय गर्दै कार्यतालिका नै कार्यान्वयन भइसकेको अवस्थामा यो विशेष महाधिवेशनको औचित्य समाप्त भइसकेको स्पष्ट पारेको छ।
पार्टीले १५ औँ महाधिवेशन २०८३ वैशाख २८ देखि ३१ गतेसम्म आयोजना गर्ने निर्णय गरेको छ। पार्टी विधान अनुसार कुनै पनि तहको अधिवेशन वा विशेष महाधिवेशन बोलाउने अधिकार व्यक्तिगत पदाधिकारी वा सदस्यलाई नभई केन्द्रीय समितिलाई मात्र रहेको छ। पार्टीले व्यक्तिगत रूपमा बोलाइने यस्ता भेलामा संलग्न नहुन पार्टीका सबै तहका पदाधिकारी, सदस्य, महासमिति सदस्य, महाधिवेशन प्रतिनिधि, भातृ तथा शुभेच्छुक संस्था एवं विदेशस्थित नेपाली जनसम्पर्क समितिलाई अपिल गरिएको छ। अब राष्ट्रिय सभा सदस्य निर्वाचन र आसन्न प्रतिनिधि सभा निर्वाचनमा पार्टी केन्दित हुने कुरा कांग्रेसले बताएको छ।