News

एमालेसँग सत्ता गठबन्धनबारे कांग्रेसभित्र मतभेद, सुरुमा पालिका अनि केन्द्रिय सरकार

hollywood Khabar5 months ago5 months ago61 mins

Spread the love

वर्तमान गठबन्धन सरकारको सबैभन्दा ठूलो घटकका रुपमा रहेको नेपाली कांग्रेसभित्र सरकारबारे गम्भीर मतभेद देखिएकोे छ। विशेष गरि नेपाली कांग्रेसका सभापति एवं पूर्व प्रधानमन्त्री शेरबहादुर देउवा र कांग्रेस वरिष्ठ नेता डा. शेखर कोइराला वर्तमान सरकारबारे गम्भीर मतभेदको अवस्थामा रहेको उनीहरुका अभिव्यक्तिले स्पष्ट हुन्छ भने अन्य प्रमुख नेताहरुसमेत सरकारबारे फरक–फरक धारणा सार्वजनिक गरिरहेका छन्।

कांग्रेसका सभापति देउवाले शनिबार जय नेपाल इन्टरनेसनल फाउण्डेसनले स्व कोइरालाको जन्मजयन्तीका अवसरमा आयोजना गरेको कार्यक्रममा कुनै पनि दलले सरकार बनाउन बहुमत ल्याउन नसक्ने भएकाले गठबन्धन गर्नुपर्ने बाध्यता रहेको बताए।

सभापति देउवाले भने, ‘बहुदलीय व्यवस्थामा प्रतिस्पर्धा हुनु स्वाभाविक कुरा हो । अहिले कुनै पार्टीको पनि बहुमत आउँदैन।गाह्रो छ, तर सरकार बनाउन त बहुमत हुनैपर्यो त्यसैले कुनै न कुनै पार्टीसँग मिल्नु पर्ने आवश्यक र बाध्यता छ, नमिली हुँदै हुँदैन । मन परेको होस् वा नपरेको होस्, यस्तै छ के गर्नु हुन्छ ? काम गर्नुपर्ने समस्या छ।’ संसदीय व्यवस्थामा प्रतिस्पर्धी र विपक्षी पार्टीसँग मिलेर काम गर्नुपर्ने आवश्यकता रहेको उनले बताए ।

सत्ता साझेदार नेपाली कांग्रेसका सांसद डा. शेखर कोइरालाले किसानप्रति सरकारो सोच नै गलत रहेको टिप्पणी गरे । कोइरालाले सकारात्मक सोचबाट अघि बढ्न जरुरी रहेको बताएका हुन् । उनले सरकारले उखु किसानलाई दिँदै आएको अनुदान कटौती गरेकोप्रति आपत्ति जनाए । मन्त्रीहरूलाई विदेश भ्रमण जान चार पटक जति रोके डेढ अर्ब पैसा तत्काल निस्किने उनले बताए । उनले भने, ‘अब छिटो भन्दा छिटो नेपाली कांग्रेसको नेतृत्व सभापतिजीले नै लिनु हुन्छ । लिएर अगाडि बढ्नुहोस् । सकारात्मक सोचबाट हामी अघि बढौँ। हामी सक्छौँ । हाइड्रो पावरमा हामीले ध्यान दिनुपर्छ । यो सामान्य खेती गरेर मात्रै हुँदैन, तपाईंहरुलाई लाग्ला यसले बढी बोल्यो भनेर तर म अहिले पनि २० बिगाह उखु लगाउँछु । २० बिगाह छ मेरो । यो सरकारको सोच कति गलत छ हेर्नुस् । सभापतिजीलाई थाहा नै छैन। २५ वर्षदेखि सुगर किन्न अनुदान दिइरहेको थियो । उखु किसानलाई । यस पटक अनुदान छैन, किनभने सरकारसँग पैसा छैन। जम्मा डेढ अर्ब लाग्थ्यो । मन्त्रीहरू विदेश गएको गई देख्छु । दुई–चार पटक मन्त्रीहरू विदेश नगइदिए त डेढ अर्ब त यहीँ उठिहाल्छ। यस्तो सोच राखौँ। आम किसानलाई त दिनुपर्छ । किसानलाई नयाँ टाइपले हेर्नुपर्छ ।’

कोइरालाले हरेक कालखण्डमा मुलुकको राजनीतिक परिवर्तनमा नेतृत्वदायी भूमिका निर्वाह गरेको पार्टीले अब आर्थिक सामाजिक रुपान्तरणको पनि नेतृत्व गर्नुपर्ने आवश्यकता औंल्याए । ‘प्रजातन्त्र स्थापना, पञ्चायत र राजतन्त्र अन्त्य तथा संविधान निर्माणमा कांग्रेसले नेतृत्वदायी भूमिका निर्वाह गर्दै आएको छ । कांग्रेसको नेतृत्वमा संविधान कार्यान्वयन गरी मुलुकलाई समृद्धिको मार्ग अघि बढाउनु पर्छ’, उनले भने । उनले हरित ऊर्जा, आधुनिक कृषि प्रणाली, उन्नत बाली प्रवद्र्धन तथा किसानलाई प्रविधिसँग जोड्न विशेष योजना ल्याउनुपर्नेमा जोड दिँदै धार्मिक, सांस्कृतिक, आध्यात्मिक र साहसिक पर्यटन प्रवद्र्धन गरी मुलुकलाई समृद्धिको यात्रामा अघि बढाउनुपर्ने बताए ।

कार्यक्रममा सभापति देउबाले मुलुकमा गणतन्त्रको स्थापना गर्न स्व कोइरालाको भूमिका महत्पूर्ण रहेकाले यसलाई भावी पुस्ताले पनि स्मरण गर्ने धारणा राखे । अहिले मुलुक गणतन्त्रलाई सुदृढीकरण गर्दै आर्थिक सामाजिक रुपान्तरणको यात्रामा अघि बढिरहेको उनले उल्लेख गरे । ‘गिरिजाबाबु नभएको भए मुलुकमा अहिल्यै गणतन्त्र आउने थिएन, गणतन्त्र ल्याउन उहाँले हिम्मत गर्नुभयो, जनमत सिर्जना गर्नुभयो’, सभापति देउवाले भने, ‘यद्यपि, अहिले केही समस्या छन्, तिनलाई समाधान गर्दै लैजानु पर्छ ।’ समावेशी राजनीतिक प्रणालीले सबै वर्ग, क्षेत्र र समुदायको राज्य संयन्त्रमा प्रतिनिधित्व सुनिश्चित गरेको जनाउँदै उनले मुलुकलाई आथिक रूपमा सम्पन्न बनाएर जनतालाई त्यसको लाभ दिलाउन सबै दल क्रियाशील हुनुपर्ने आवश्यकता औंल्याए ।

कांग्रेस नेता एवं युवा तथा खेलकुदमन्त्री तेजुलाल चौधरीले गिरिजाबाबु क्रान्ति र शान्तिको नायकका रूपमा रहेको बताए । ‘गिरिजाबाबु जे बोल्नु हुन्थ्यो, त्यो गर्नु हुन्थ्यो’, उनले भने । मन्त्री चौधरीले राष्ट्रिय तथा अन्तर्राष्ट्रिय प्रतियोगितामा विजेता खेलाडीलाई प्रोत्साहित गर्न सरकारले विभिन्न पुरस्कार र सम्मानको व्यवस्था गरेको जानकारी दिए । कांग्रेसका सहमहामन्त्री महालक्ष्मी उपाध्याय (डिना) ले जनताको संघर्षको माध्यमबाट प्राप्त राजनीतिक उपलब्धिलाई सुदृढ गर्न सबै एकजुट हुनुपर्नेमा जोड दिइन् । उनले संविधानमा भएको जनअधिकार कार्यान्वयन गर्न एकजुट हुनुपर्ने उल्लेख गर्दै राजनीतिमा युवा पुस्ताको सहभागिता अनिवार्य रहेको धारणा राखिन् । कार्यक्रममा सभापति देउवाले राष्ट्रिय तथा अन्तराष्ट्रिय प्रतियोगिताका विजेता नेपाली खेलाडी तथा स्वतन्त्र विद्यार्थी युनियनको निर्वाचनमा विजयी उम्मेदवारलाई सम्मान गरेका थिए ।् सत्ता साझेदार नेपाली कांग्रेसले प्रधानमन्त्री केपी शर्मा ओली नेतृत्वको सरकारले अपेक्षित गति लिन नसकेको भन्दै असन्तुष्टि जनाएको छ । यसैगरी पार्टीका प्रचार विभाग प्रमुख मीन विश्वकर्माले कांग्रेसले सरकारलाई दुवै काँध थापेर पूर्ण समर्थन गर्दा पनि कार्यसम्पादन सुस्त रहेको टिप्पणी गरेका छन् । शनिबार काठमाडौंमा आयोजित गरेको साक्षात्कारमा बोल्दै विश्वकर्माले सरकारको गतिप्रति पार्टी सन्तुष्ट नरहेको स्पष्ट पारे । ‘कांग्रेसले एउटा मात्रै काँध होइन, दुईवटै काँध थापिदिएको छ । तर, सरकारले भने जस्तो गति पक्रिन नसकेको कुरा मैले ढाकाछोप गर्न सक्दिनँ । गति पक्रिन सकेको छैन,’ उनले भने ।

यद्यपि, विश्वकर्माले कांग्रेस तत्काल सरकार परिवर्तनको पक्षमा नरहेको स्पष्ट पारे । उनले सरकार बदल्ने भन्दा पनि सरकारको कार्यशैली र कार्यसम्पादनमा सुधार हुनुपर्नेमा पार्टीको जोड रहेको बताए । ‘अहिले हामी सरकार बदल्ने भन्दा पनि सरकारको कार्यशैली बदल्नु पर्छ भन्ने निष्कर्षमा छौँ,’ उनले भने, ‘त्यही निष्कर्षको आधारमा केन्द्रीय समितिको बैठक चलिराखेको छ । हामी सरकारको कार्य सम्पादनबारेमा समीक्षा गर्दैछौँ र नागरिकका असन्तुष्टिलाई पनि हामीले बैठकमा छलफल गरेका छौँ ।’ नेता विश्वकर्माले सरकार जनताको टुटेको विश्वासलाई जोड्ने गरी अघि बढ्नुपर्ने आवश्यकता औंल्याए । उनले सुशासनको सम्बन्धमा भने भर्खरै केही सरलता र सुगमता आएको स्वीकार गरे ।

नागरिक उन्मुक्ति पार्टी (नाउपा) ले केपी शर्मा ओली नेतृत्वको गठबन्धन सरकारलाई दिएको समर्थन फिर्ता लिँदै आफ्नो मन्त्रीलाई फिर्ता बोलाएको छ । पार्टीको शनिबार बसेको संसदीय दलको बैठकले केपी ओली नेतृत्वको गठबन्धन सरकारलाई दिएको समर्थन फिर्ता लिने निर्णय गरेको हो । नाउपा अध्यक्ष रञ्जिता श्रेष्ठले पार्टीको तर्फबाट मन्त्री बनेकाले आइतबार राजीनामा बुझाउने जानकारी दिइन् ।

केपी ओली नेतृत्वको गठबन्धन सरकारमा नाउपाबाट सांसद अरुण चौधरी संस्कृति, पर्यटन तथा नागरिक उड्डयन राज्यमन्त्री छन् । सुदूरपश्चिम प्रदेश सरकारका मुख्यमन्त्री कमलबहादुर शाहले नाउपाको तर्फबाट उद्योग पर्यटन वन तथा वातावरणमन्त्री भएका रामेश्वर चौधरीलाई बर्खास्त गरेपछि नाउपा चिढिएको थियो । सुदूरपश्चिम प्रदेशमा शुक्रबार समर्थन फिर्ता लिएको नाउपाले शनिबार संघ सरकारलाई दिँदै आएको समर्थन पनि फिर्ता लिएको हो ।