दुप्चेश्वरमा भएको दोस्रो आरडब्लू समर स्लाममा नुवाकोटे टाइगर हेभिवेट च्याम्पियन

नेपाल रेस्लिङ संघ नुवाकोट शाखाको आयोजनामा नुवाकोटको दुप्चेश्वरमा सम्पन्न दोस्रो आरडब्लू समर स्लामको हेभिवेट च्याम्पियनको उपाधि नुवाकोटे टाइगरले जितेका छन् । उनले डेभिडलाई पराजित गरे । डेभिड यसअघि बसन्तपुरमा भएको पहिलो हेरिटेज रिङ रेस्लिङका हेभिवेट च्याम्पियन हुन् । 

त्यसैगरी त्रिपल थ्रेटतर्फ साइन, चट्टान र किङ रोबर्र्टबीचको खेलमा साइन च्याम्पियन बने । उनी पनि नुवाकोटका नै हुन् । महिला तर्फको उपाधि तनुले जितिन् । उनले आकृतिलाई पराजित गरिन् । ट््याग टिम म्याचमा सिजे वल्र्ड र योङ स्याडीलाई स्पाइडर म्यान र बाकाको जोडीले पराजित गरे । कार्यक्रमका प्रमुख अतिथि पूर्वमन्त्री डा. प्रकाशशरण महतले दुप्चेश्वर महादेव मन्दिरलाई एसियाकै प्रमुख १० धार्मिक पर्यटकीय स्थलको रुपमा परिचित गराउने बताए । नुवाकोटका विभिन्न स्थानबाट मन्दिरसम्म पुग्नका लागि बनाइएका सडकको स्तरोन्नती गर्ने पनि उनले बताए । 

नेपाल रिङ रेस्लिङ संघका केन्द्रिय महासचिव सुवर्ण श्रेष्ठले दुप्चेश्वरमा खेल आयोजना गर्न सहयोग गर्ने सबैलाई धन्यवाद दिँदै नेपालमा रिङ रेस्लिङको क्रेज बढ्दै गएको बताइन् । दुप्चेश्वर गाउँपालिकाका अध्यक्ष योविन्द्र सिंह तामाङले रेस्लिङ खेलको माध्यमबाट दुप्चेश्वर महादेव मन्दिरको प्रचार गर्ने नेपाल रिङ रेस्लिङ संघ नुवाकोट प्रति आभार प्रकट गरे । 
नेपाली कांग्रेस नुवाकोटका सभापती रमेश महतले दुप्चेश्वर महादेव सबैको आस्थाको केन्द्र बनेको बताउँदै यसको थप प्रचारप्रसार गर्ने बताए । नेपाली कांग्रेस प्रदेश सभापती तथा समाजसेवी शुसिल खड्काले राजनीति भन्दा माथि उठेर दुप्चेश्वर महादेव मन्दिरको विकासमा आफू लागेको बताए । 

उनले खेलको माध्यमबाट विभिन्न पर्यटकीय स्थलको प्रचार गर्न सकिने बताए । नेपाल रिङ रेस्लिङ संघ नुवाकोटका अध्यक्ष प्रल्हाद थापाले नुवाकोटको विभिन्न पर्यटकीय स्थलको प्रचारप्रसारका लागि रेस्लिङ प्रतियोगिता आयोजना गरिएको बताए । यसअघि शिवपुरी गाउँपालिकाको सुइरेचौरमा खेल आयोजना गरिएको स्मरण गर्दै उनले अब नुवाकोटको अर्को स्थानमा पनि निकट भविष्यमा नै प्रतियोगिता सञ्चालन गर्ने बताए । 

रेस्लिङ प्रतियोगिताका विजयी खेलाडीहरुलाई नेपाल रिङ रेस्लिङ संघका केन्द्रिय महासचिव सुवर्ण श्रेष्ठ, दुप्चेश्वर गाउँपालिकाका अध्यक्ष योविन्द्र सिंह तामाङ, शिवपुरी गाउँपालिकाका अध्यक्ष रामकृष्ण थापा, नेपाली कांग्रेस प्रदेश सभापती सुशिल खड्का लगायतले नगद पुरस्कार, मेडल र प्रमाणपत्र प्रदान गरेका थिए । रेस्लिङ प्रतियोगिता हेर्नका लागि ७ हजारभन्दा बढी दर्शक उपस्थित थिए । कार्यक्रममा मदन थापा र प्रतिमा अर्यालले विभिन्न दोहोरी गीत गाएर मनोरञ्जन दिलाएका थिए ।