जगत् चिडियाखाना

0
shares

by Krishna KC | Updated: 28 Mar 2020

718 views
-जगत् चिडियाखाना

पर्खालमा छन् अझ तार जाली

छ बन्द बाटो तन छैन लाली

चरा यहाँ छन् बिचरा बनेका

छन् प्वाँख के भन्नु र कक्रिएका ? १।

छन् बाघ नंग्रासित नै गलेका

छन् सिँह उस्तै चितुवा ढलेका

हुन् भालु वा स्याल कि वा बिराला

हुँडार होऊन् सब छन् निराला !२।

देखिन्न केही गजराज काज

छ दिक्क एक्लै मनको निराज

निष्प्राणजस्तै अझ सर्प ,गोही

देख्लान् कहाँ सुन्दर स्वप्न केही ?३।

हिलो र मैलो ढलको उपर्ना

ओढेर सुत्छन् दिनरात अर्ना

चिनिन्न गैँडा मलमा छ डल्लो

जता दियो दृष्टि उतै छ खल्लो ! ४।

कडा लिओस् तीर तथापि दुम्सी

कुनातिरै लत्रिरहेछ गुम्सी

न वानरै चंचलको छ खेल

रच्छन् विधाता किन जालझेल ?५।

छेवै परे दर्शक आश गर्छन्

मुन्टो उठाई मन ताप भर्छन्

ऋणी बनाईकन मिर्गलाई

को खेल्न आयो जगमा रमाई ?६।

आहालमा हाँस कता रमाऊन् !

सफा कहाँ यी जल भेट्न पाऊन् !

छ नाम घोडा वनपालुवाको

हो बास कस्तो जड बालुवाको ?७।

छ के यहाँ ? जीवन छैन सास

अव्यक्त बाधा सब छन् उदास

हो चेतनाको कुन यो कमाइ ?

आनन्द कस्तो चिडिया समाई ?८।

होला यहाँको कुन शोक बुझ्ने ?

होला यहाँको कुन भोक बुझ्ने ?

बोल्ने कराए अधिकार पाए

लाटा बने यी अनि मार खाए !९।

धिक्कारजस्तो अभिसारजस्तो

प~यो यिनैमा किन वज्र यस्तो ?

भेटिन्न केही अपराध कर्म

यी मान्न आए कुन दैव धर्म ?१०।

जन्जालको जाल बनाउने को ?

स्वतन्त्र यी प्राण ढलाउने को ?

उद्दण्डमा दण्ड दिलाउने को ?

बोल्यो यहाँको अधिकारमा को ?

तीर्थराज अधिकारी

(छन्द:उपजाति )

(साभार:सत्ताका किनाराहरू-कवितासंग्रह - २०७० बाट)