दिपक अभिमन्यू

गजल कहिलेकहीं त आँसुको न्यानोमै निदाउछु

Hollywood Khabar March 01,2018 Comments

पूर्णिमाको जुनको ज्योतिसँगै रहर पठाएको छु,नभुल्नु है तिम्ले ।
बिहानीको शितल पवनसंगै खबर पठाएको छु,नभुल्नु है तिम्ले ।।

कहिले परिस्थितीले छेक्यो आउन, कहिले त्यो पापी परिवेशले ।
अगेनोछेउ बस्दै गर म आगो बनी भर्भराएको छु,नभुल्नु है तिम्ले ।।

मौसम त बदलिन्छ नै,तर कहिले विवशताले नबदलियोस मन ।
बुझिराख्नु तिम्रो लागि म कति हरहराएको छु,नभुल्नु है तिम्ले ।।

कहिलेकहीं त आँसुको न्यानोमै निदाउछु तिम्रै यादमा सायद ।
तिम्रै नाम जप्दै निन्द्रामा धेरै बर्बराएको छु,नभुल्नु है तिम्ले ।।

त्यति सहज छैन मनभित्र वास दिई सकेपछि भुल्न तिम्लाई ।
तिम्रै पुकार गर्दैगर्दै बादल झैं गडगडाएको छु,नभुल्नु है तिम्ले ।।

सम्बन्धित खबर