-चेतनाथ कणेल-हरित
स्यावास् सांसदज्यूहरू
स्यावास् जनताका प्रतिनिधिज्यूहरू
म लिम्पियाधुरा आज
नयाँ नेपालको नयाँ संविधानमा
सर्वसम्मतले अनुसूचित भएर
एकपटक फेरि उत्ताल हाँसो हाँसिरहेछु
प्रसन्नताको अपी र सैपाल चढिरहेछु
म नयाँबानेश्वरको भव्य भवनमा बुर्कुसिएको छु आज
म लिपुलेकसँगै गद्गदाएको छु,
म कालापानीसँगै हर्षविभोर छु आज !
हामी अखण्डित हौँ सार्वभौम नेपालमा
हामी प्रफुल्लित छौँ स्वाभिमानी नेपालमा
चुच्चिएरै चुलिएका छौँ
चर्चित भएरै उक्लिएका छौँ
लिपुलेक र कालापानीको साक्षी बनेर
म लिम्पियाधुरा कालीको शिर बनिरहेछु
प्रिय नेपालको अविच्छिन्नतामा रमिरहेछु
हुन्छ भन्नेहरूले हुन्छ भन्नुहोला ....
जब सप्पै माननीयहरूले समवेत् स्वरमा
‘हुन्छ भन्नुभयो,
म गद्गद् भएँ/ म असीम आनन्दमा डुबुल्की मारेँ
म नयाँबानेश्वरको भव्य भवनमा बुर्कुसिएको छु आज
म लिपुलेकसँगै गद्गदाएको छु,
म कालापानीसँगै हर्षविभोर छु आज !
जुन दिन सजिएको थिएँ नेपालको नयाँ नक्सामा
मेरो खुसीको सीमाले सगरमाथा चुमेको थियो
मेरो चर्चामा उमङ्ग मनाउनेहरूसँग
म त्यसै–त्यसै उमङ्गिएको थिएँ
त्यही दिन बेस्सरी हाँसेथे लिपुलेक र कालापानीसँग
म अखण्डताको परिपोषक
म राष्ट्रियताको उद्घोषक
आज एकपटक फेरि सगरमाथातिर फर्केर
आज एकपटक फेरि लुम्बिनीतिर गम्केर
जय होस् नेपाल भनिरहेछु
धन्य हुन् नेपाली जनता भनिरहेछु
म लिम्पियाधुरा आज–
म नयाँबानेश्वरको भव्य भवनमा बुर्कुसिएको छु आज
म लिपुलेकसँगै गद्गदाएको छु,
म कालापानीसँगै हर्षविभोर छु आज !!
**३१ जेठ, २०७७, शनिवार (१३ जुन, २०२०), नयाँबानेश्वर, शङ्खमूल, काठमाडौँ ३१**
सिफारिस
एनआरएनएमा कुन बाटो होइन मुक्त राजनीतिको मूल बाटो
हेड्स नेपालद्वारा मानसिक स्वास्थ्यको क्षेत्रमा काम गर्ने हेड्सको प्रति...
रूपान्तरण!
हारेको कांग्रेसको रुन्चे ढिपीका कारण गृहमन्त्रीले पेश गर्ने बिधेयक सुच...